Language: Malayalam

മകളേ നീ വലുതാകുമ്പോൾ
പക തോന്നരുതമ്മയൊടൊട്ടും
അകലേക്കു മറഞ്ഞവളേയെൻ
സകലവുമാണെന്നും നീയേ

ഒരു മാർഗ്ഗവുമില്ലാഞ്ഞല്ലോ
അകലേക്കു പറഞ്ഞു വിടുന്നു
വിറയാർന്നിരു കൈകൾ വീശി
അകലേയ്ക്കു പറഞ്ഞു വിടുന്നു
ഒടുവിൽ ഒരു നാളു വരും
അന്നമ്മയശോദയൊരാളു വരും
അവൾ നിന്നെയെടുത്തു വളർത്തും
അലിവോടൊരു പാർപ്പിടമേകും

വിധി നിന്നെയടർത്തിയ നാൾ ഞാൻ
മതികെട്ടു മറിഞ്ഞു പതിച്ചേ
നിലവിട്ടു കരഞ്ഞു തളർന്നേ
മുലഞെട്ടറിയാതെ ചുരന്നേ
ചെറുതല്ലാ വേദനയെന്റെ
കരളല്ലെ പറിച്ചു കൊടുത്തു!
മുറിവേകിയ നീറ്റലതെന്റെ
മരണം വരെ മാറുവതുണ്ടോ?

മകളേ നീ വലുതാകുമ്പോൾ
പക തോന്നരുതമ്മയൊടൊട്ടും
അകലേക്കു മറഞ്ഞവളേയെൻ
സകലവുമാണെന്നും നീയേ
മകളേ നീ വലുതാകുമ്പോൾ
പക തോന്നരുതമ്മയൊടൊട്ടും

Movie/Album name: Poka